क्षण

क्षण क्षण आयुष्याचा - रंगीबेरंगी स्वप्नांचा

रंगांमधे रंगून सार्‍या - रंग वेगळा जपण्याचा ||

एक क्षण आनंदाचा - मुक्तपणे हसण्याचा            
सौख्याचे चे दान   - घेता घेता देण्याचा ||

                                                                            

एक क्षण दु:खाचा - आगतिक अश्रुंचा
दु:खाचे वार - धीराने सोसण्याचा ||

एक क्षण प्रेमाचा - गंधभरल्या प्रितीचा

मनमुक्त होउन - सजणावरती भाळण्याचा ||

एक क्षण मायेचा - मातृत्वाचा ममतेचा

इवल्या इवल्या पिल्लाला - प्राणांच्या ओंजळीत जपण्याचा ||

एक क्षण रागाचा - वैफल्याचा, त्राग्याचा

अपयशाचे श्रेय - मनोभावे स्विकारण्याचा ||

एक क्षण उद्वेगाचा - खिन्नतेचा , अशांततेचा

मनातले काहूर - समजण्याचा , उमजण्याचा ||

एक क्षण समाधानाचा - सात्विकतेचा, साफल्याचा

कर्तव्याच्या यज्ञात - समिधा अर्पण करण्याचा ||

एक क्षण तृप्तीचा - सार्थकतेचा, साधनेचा

आयुष्याचे देणे  - ईश्वर चरणी वाहण्याचा ||

क्षण क्षण आयुष्याचा - क्षणाक्षणांनी जगण्याचा

कणाकणात मिसळून - एका क्षणी त्यागण्याचा ||