दैवी दान

वेदना ही आज माझी - अंतरीची साद आहे

देह माझा चंदनी अन चित्ती तुझा नाद आहे ।

जगले मी श्वासांसवे - ध्यास तुझाच घेउनी

उमगले अंती आता - श्वास माझा तूच आहे ।

दिवस चालती काळोख - सांगाती घेउनी

रवी-शशी नभी असता अंधाराचे नाव आहे ।

सतत वर्षती अमृतधारा परोपरी धरेवरी

आठवांचा मन्मनी धगधगणारा दाह आहे

वाटेवरी पसरलेली काटेरीच पखरण ही

रंग गंधी फुलाफुलांचा गाव किती दूर आहे ।

चांदण्यांची शुभ्र फुले - वेचियली मी येथे

भंगलेल्या स्वप्नांचा - आज मला शाप आहे ।

डोळ्यांनी या आजही, घात माझा केला

कळले अन् सार्‍यांना - दुः खाचा हा घाव आहे ।

र्‍हुदयीच्या जखमा अशा अलवार मी जपल्या

बोल कशी लावू ? - मम दैवाचे ते दान आहे ।