🌱 मोगरा फुलला: भेळ

१२ ऑक्टो, २०११

भेळ

वरण भात, भाजीपोळीचा

घालूनी सारखा मेळ ।

वीट आला, चला ना राया

खाऊ छानशी भेळ ॥

रोज पहाटे उठुनी लवकर

आधण ठेविते मी चुलीवर ।

रांधा , वाढा, उष्टी करता

संपून जातो वेळ ॥

वीट आला या साऱ्यांचा

आता खाऊ छानशी भेळ ।

सासरेबुवांना पालेभाजी

कोशिंबिरी सासू खाई ।

कढी भाताचा हट्ट नणदेचा

माझे करील हार्ट फेल ॥

वीट आला सोडा सारे

खाऊ छानशी भेळ ।।

दहा वाजताची कचेरी

साहेबाची तिथे शिरजोरी ।

वर्ड अन एक्सेल च्या फाईली

कधी संपणार हा वेळ ? ॥

वीट आला चला आता

खाउ छानशी भेळ ॥

रोज रोज ची तीच गणिते

तेच शिक्के अन तसेच शेरे ।

ये जा करिती आकडे

त्यांचा जमेना ताळ मेळ ॥

वीट आला जाऊया आता

खाऊ छानशी भेळ ॥

चौपाटीची हवाच न्यारी

सोबत आणिक तुमची स्वारी ।

मऊ वाळूत उभे राहूनी

पाहू लाटांचा खेळ ॥

साद घालतो दर्या चला ना

खाऊ छानशी भेळ ।

कांदा कैरी बारीक कापून

त्यावर ताजी शेव पसरून ।

थोडा ठेचा घेऊ मागून

घास घेता

जाल विसरूनी तुम्ही काळ वेळ ॥

सांगितले ना आवडेल तुम्हा

अशी छानशी भेळ ।

चला ना राया आता आपण

खाऊ छानशी भेळ ॥

🍂🍂💐🍃🍃

मराठी साहित्याने मला खूप काही दिले. पुस्तके ही माझ्यासाठी नुसते मनोरंजन किंवा ज्ञानार्जनाची साधने नाहीत. ती माझ्या सुखात, दुःखात सहभागी झाली.  माझ्या कठीण काळात त्यांचीच साथ मला लाभली .  एक वाचक या नात्याने मी मराठी साहित्यातील लेखक/लेखिका,  कवी/ कवयित्रींची ऋणी आहे. .... आणि हे असे ऋण आहे जे कधी फिटू नये ... तर अजून वाढतच जावे हीच इच्छा आहे.