🌱 मोगरा फुलला: पतंग

१८ डिसें, २०१०

पतंग

निळे जांभळे

लाल गुलाबी

पतंग कसे

पहा उडती |

उंच विहरती

वार्‍यावरती

शुभ्र सावळ्या

मेघांवरती |

झुलती हसती

वरती खाली

खगांसंगती

जोडूनी नाती |

शेपूट हाले

तयां मागुती

फडफडकरुनी

काय सांगती |

घेण्या बघती

उंच भरारी

सगे सोयरे

घेत सोबती |

धुंद होऊनी

स्वैर नाचती

सूत्र आपुले

परी न स्मरती |

कुंठीत होई

गती पळभरी

क्षणी गुंतती

अन् अडखळती |

वाट नभीची

सोडूनी आणिक

झेप घेती ते

अवनीवरती |

गर्व विरुनी

स्मरती गाती

नाते आपुले

धरे संगती |

उमगे अंती

सूत्र आपुले

राही सदा ते

माती वरती |

🍂🍂💐🍃🍃

मराठी साहित्याने मला खूप काही दिले. पुस्तके ही माझ्यासाठी नुसते मनोरंजन किंवा ज्ञानार्जनाची साधने नाहीत. ती माझ्या सुखात, दुःखात सहभागी झाली.  माझ्या कठीण काळात त्यांचीच साथ मला लाभली .  एक वाचक या नात्याने मी मराठी साहित्यातील लेखक/लेखिका,  कवी/ कवयित्रींची ऋणी आहे. .... आणि हे असे ऋण आहे जे कधी फिटू नये ... तर अजून वाढतच जावे हीच इच्छा आहे.