आवाहन !

अनावर वाहणारा वारा
आणि त्या बरोबर उडणारा पालापाचोळा
दाही दिशा कोंदून टाकणारी धूळ
आणि कृष्ण मेघासह दाटत चाललेला अंध:कार
बेभान होऊन डोलणारे  वृक्ष
आणि उंच उंच उसळणाऱ्या लाटा
सारा आसमंत रौद्र भीषण झालेला
कृतांतालाही क्षणभर भय वाटेल
आणि आघोराचेही काळीज भीतीने थरथरेल
असा हा निसर्ग ....
अविरत वेगाने कोसळणाऱ्या पर्जन्य धारा
आणि त्या झेलीत स्तब्ध असलेली धरित्री
पंचमहाभूतांनी आपल्या
साऱ्या मर्यादा उल्लंघलेल्या
पापाच्या कर्दमाचा दाटसर थर
भूमिवर पसरत चाललेला
आणि त्यात नवीन कोवळ्या अंकुरांनी
प्राण सोडलेला ..
विश्वाच्या कणाकणातून
एकच उदघोष ऐकू येतो आहे
हे सर्वेश्वरा या सगळ्याला बांध घालायला
तूच या धरातलावर अवतार घे
निरंकुश पाशवी शक्तींना
आणि त्यांच्या अनाचाराला
मर्यादा घालण्याकरिता
तूच सूत्रधार हो ..
तुझ्या पवित्र अस्तित्वाने
हा भयाने भारलेला आसमंत बहरेल
नवजीवन फुलेल
आणि तुझ्या तेजोमय प्रकाशात
हा पापी अंध:कार लोप  पावेल .
मग पुन्हा एकदा   उमटतील
सुख समृद्धीच्या खुणा
या नांदत्या , जागत्या  धरतीवर