एकरूप

चंद्रभागेच्या तीरी .. भगतांची मांदियाळी 
टाळ चिपळ्यांची खेळी .. गर्जे सांज अन सकाळी ॥

नाचे किर्तनाच्या रंगी .. भक्तिरस अंगोपांगी 

हर्ष दाटे अंतरंगी .. गुण विठ्ठलाचे सांगी ॥ 

हरिनामाचा गजर .. ऱ्हुदयी हरीचा वावर 

पाकळी पाकळी अंतर .. गंध भरे निरंतर ॥

ओढ पावलासी लागे .. नाम जप मुखी रंगे 

सावळ्याच्या दर्शना गे .. संत पुढे , जन मागे ॥

शोभे तुळशीमाळ गळा ..  माथी चंदनाचा टिळा 

विठू साक्षात सावळा .. माया त्याची जनसकळा ॥


दिंडी भक्तांची ही चाले .. ध्वजा भक्तीचीच डोले 

वाळवंटी जन आले .. श्वास, श्वास विठ्ठल झाले ॥ 

जनभक्तीचा सागर .. विठूनामाचा जागर 

भक्तीचाच गहिवर .. भारलेले चराचर ॥

झाले कैसे अपरूप .. सावळे सगुण स्वरूप 

पाहूनीया हे आरूप .. सान थोर एकरूप ॥