🌱 मोगरा फुलला: "अजूनी अंबरात --"

१९ मे, २०१०

"अजूनी अंबरात --"

हसर्‍या नाजूक कळ्या किती

कोमेजून गेल्या |

पर्णभार वृक्षाचाही

गळोनिया गेला |

निमाल्या उसळत्या लाटा

काजळला किनारा |

डोंगरासही सावल्यांचे

भय वाटे आता |

वार्‍याच्या चुकार लहरीस

सांगे तृणपात |

नक्षत्रांची गाज आहे

अजूनी अंबरात ||

धगधगता दिनमणी तो

सागरी बुडाला |

असीम जलराशीवरी

अंधार्‍या छाया |

अनवट वाटा क्षितीजावरती

विरुनिया गेल्या |

वादळाच्या खूणा उमटल्या

धरतीवर ओल्या |

दीपस्तंभीचा प्रकाश सांगे

त्या काळोखात |

नक्षत्रांची गाज आहे

अजूनी अंबरात ||

धागा धागा उसवित विरले

अंधारे जाळे |

प्राची वरुनी दूर जाती

मेघ ही काळे |

पूर्वेच्या प्रांगणी शिंपिले

केशराचे सडे |

सोनसळी स्वप्न धरेचे

हळूवार उलगडे |

रविकिरणांचे भाट सांगती

गात आसमंतात |

नक्षत्रांची गाज आहे

अजूनी अंबरात ||

🍂🍂💐🍃🍃

मराठी साहित्याने मला खूप काही दिले. पुस्तके ही माझ्यासाठी नुसते मनोरंजन किंवा ज्ञानार्जनाची साधने नाहीत. ती माझ्या सुखात, दुःखात सहभागी झाली.  माझ्या कठीण काळात त्यांचीच साथ मला लाभली .  एक वाचक या नात्याने मी मराठी साहित्यातील लेखक/लेखिका,  कवी/ कवयित्रींची ऋणी आहे. .... आणि हे असे ऋण आहे जे कधी फिटू नये ... तर अजून वाढतच जावे हीच इच्छा आहे.