🌱 मोगरा फुलला: वारा

८ ऑक्टो, २००९

भंगलेल्या स्वप्नांचे चहूकडे रंग उधळी वारा
स्मरणांच्या चाहूलीने बेभान हा वारा ।

रेतीच्या कणांमध्ये सामावे जन्म सारा
कणकण जोडते मी, विखरून जाई वारा ।

तेजाळतो नभांगणी, शुभ्रप्रकाशी तारा
अंधः कार वेढून घेई, शांतवी दीप तो वारा ।

पखरा रे ऐक हाक ही देई आसमंत सारा
मोडेल मायेचे घरटे, अनावर हा वारा ।

ओढ लावीते जीवन येता सामोरा किनारा
तांडव करितो मृत्युसंगे पिसाटलेला वारा ।