🌱 मोगरा फुलला: पगडी

५ सप्टें, २०१०

पगडी

गाव तिथे चावडी

चावडी तिथे वावडी |

गोर्‍या गोर्‍या हातात

सखु भरते बांगडी |

लगबगीने चालताना

सांडली तीची बुगडी |

पायवाटेच्या धुळीने

माखली हिरवी साडी |

डोईवरती पदर घेता

डोळ्यात टोचली काडी |

उन्हाची काहीली

काळजास घरं पाडी |

ओरडून ओरडून कोणी

देतो पहा दवंडी |

गुलाल, बुक्का उधळीत

दंडवत घाली बेगडी |

आंधळ्याच्या हातात

होती एक तागडी |

पण नवलच घडले

पडली दाजीबाची माडी |

सांगोवांगीचीच कहाणी

ऐकते सारी वाडी |

गाव बोले चांगभलं

नवस देवाचा फेडी |

कशी , कुठे, कधी, कुणी

जोडली कडीला कडी |

रंगलेल्या कलगी-तुर्‍यात

मिरवते पुणेरी पगडी |

🍂🍂💐🍃🍃

मराठी साहित्याने मला खूप काही दिले. पुस्तके ही माझ्यासाठी नुसते मनोरंजन किंवा ज्ञानार्जनाची साधने नाहीत. ती माझ्या सुखात, दुःखात सहभागी झाली.  माझ्या कठीण काळात त्यांचीच साथ मला लाभली .  एक वाचक या नात्याने मी मराठी साहित्यातील लेखक/लेखिका,  कवी/ कवयित्रींची ऋणी आहे. .... आणि हे असे ऋण आहे जे कधी फिटू नये ... तर अजून वाढतच जावे हीच इच्छा आहे.