🌱 मोगरा फुलला: आभाळ

१० जुलै, २००९

कोसळोनी यावे .. आभाळ आज वाटे
ओसंडोनी जावे अन् .. जळं साचलेले

गुंफलेली माला जणू .. व्हावे त्या सरींनी
ओघळलेले मोती व्हावे .. थेंब पावसाचे

चमचमत्या किरणां सवे .. इंद्रधनू रेखावे
शीळ घुमावी वार्‍याची .. हिरव्या, ओल्या बना मधे

सळसळत्या पानांतूनी .. संगीत नवे जन्मावे
रंग रंगी, सुरेल कंठी .. खगांनी मग ते गावे

रंगीत-गंधीत धात्रीने .. साज सुखाचे ल्यावे
मेघश्याम आभाळ तीला .. क्षितीजावर भेटावे