🌱 मोगरा फुलला: शारद ऋतु !

६ ऑक्टो, २०१०

शारद ऋतु !

दरवळतो फुलुनी केवडा

घमघमतो चाफा हिरवा

रानजाई फुलवित-झुलवित

येई ॠतु शारद बरवा |

उमलती पुष्पे किती

चमकती लक्ष काजवे |

हळूवार जललहरींना

खळखळणारा नाद नवा ||

असा मोरपिशी गारवा

छेडी मदीर मारवा |

सळसळ नाजूक पानोपानी

घुमे रानात पारवा ||

गंधीत ही रात्र जागी

धुंदीत या दिशादिशा |

मदभरी थंडी गुलाबी

उमलवी शहारा नवा ||

वाजवी तु मंजुळ पावा

झुले गर्द हिरवा रावा |

रस-रंग, स्वर-गंधी हा

कुणी कुणा नजराणा द्यावा ||

गीत तुझे स्पंदनी

स्वप्न तुझे लोचनी |

स्पर्श तुझा साद देई

हाती तुझाच हात हवा ||

शुभ्र तेजाळ चांदवा

मंद मंद ही हवा |

मार्गावरी या माझीया

चांदण्याचा भास नवा ||

🍂🍂💐🍃🍃

मराठी साहित्याने मला खूप काही दिले. पुस्तके ही माझ्यासाठी नुसते मनोरंजन किंवा ज्ञानार्जनाची साधने नाहीत. ती माझ्या सुखात, दुःखात सहभागी झाली.  माझ्या कठीण काळात त्यांचीच साथ मला लाभली .  एक वाचक या नात्याने मी मराठी साहित्यातील लेखक/लेखिका,  कवी/ कवयित्रींची ऋणी आहे. .... आणि हे असे ऋण आहे जे कधी फिटू नये ... तर अजून वाढतच जावे हीच इच्छा आहे.