🌱 मोगरा फुलला: मार्च 2013

१३ मार्च, २०१३

बोलणार नाही ...

घाव झेलले जिव्हारी .. शब्द सोसले विखारी

जपले मी काळजात .. दु:ख माझे जरतारी ।

खंत माझी एव्हढी की .. आकळेना कुणा काही

आसावली माझी दिठी .. परि कुणा जाण नाही ।

मनी दाटलेले किती .. मग सांगणार नाही ।

अडखळे शब्द ओठी .. पण बोलणार नाही ॥

तुटलेले सारे धागे .. गुंतलेले पाश सारे

जिवलगांच्या दिठीत .. पोरकेपण माझे जागे ।

सारे काही साचलेले .. जिवापाड राखलेले

डहूळते आज सारे .. कसे? का? न कळे काही ।

मनी दाटलेले किती .. कुणा सांगणार नाही ।

अडखळे शब्द ओठी .. पण बोलणार नाही ॥

ऐलतीरी माया पाश .. पैलतीरी सौख्य रास

भवसागरा मध्ये .. हिंदोळते माझी नाव ।

भय दाटलेले जरी .. चित्त ग्रासलेले तरी

परतुनी जाणे आता .. मज जमणार नाही ।

मनी दाटलेले किती .. कुणा सांगणार नाही ।

अडखळे शब्द ओठी .. पण बोलणार नाही ॥

🍂🍂💐🍃🍃

मराठी साहित्याने मला खूप काही दिले. पुस्तके ही माझ्यासाठी नुसते मनोरंजन किंवा ज्ञानार्जनाची साधने नाहीत. ती माझ्या सुखात, दुःखात सहभागी झाली.  माझ्या कठीण काळात त्यांचीच साथ मला लाभली .  एक वाचक या नात्याने मी मराठी साहित्यातील लेखक/लेखिका,  कवी/ कवयित्रींची ऋणी आहे. .... आणि हे असे ऋण आहे जे कधी फिटू नये ... तर अजून वाढतच जावे हीच इच्छा आहे.