🌱 मोगरा फुलला: मे 2012

२९ मे, २०१२

माहित आहे ...

घुसमटलेले क्षण आणि
गुदमरलेले दिवस
दाटलेली कुंद हवा अन्
सरपटणारे आयुष्य ।
प्रकाशाचा एक कवडसा
घुटमळतो आहे कधीचा बाहेर
छताला लटकलेली जळमटे
थरथरताहेत वार्‍याच्या झोता बरोबर
बाहेर झगझगीत प्रकाश
आणि आत मिट्ट काळोख
बाहेर घोंघवणारा वारा अन्
आत शवासासाठी कसावीस मन ।
दाराची बंद कडी
करकरते आहे क्षणोक्षणी
सोनेरी पिवळे फुलपाखरू
गरगरते आहे बंद खिडकीभोवती ।
माहित आहे मला,
कि उघडेल कधी हे दार,
आणि खिडकीची तावदानेही
संपवतील सगळा विरोध ।
मग पसरेल घरभर सार्‍या
शुभ्र तेजस्वी प्रकाश
आणि दरवळेल धुंद सुगंध
झुळझुळणार्‍या वार्‍यासोबत ।

🍂🍂💐🍃🍃

मराठी साहित्याने मला खूप काही दिले. पुस्तके ही माझ्यासाठी नुसते मनोरंजन किंवा ज्ञानार्जनाची साधने नाहीत. ती माझ्या सुखात, दुःखात सहभागी झाली.  माझ्या कठीण काळात त्यांचीच साथ मला लाभली .  एक वाचक या नात्याने मी मराठी साहित्यातील लेखक/लेखिका,  कवी/ कवयित्रींची ऋणी आहे. .... आणि हे असे ऋण आहे जे कधी फिटू नये ... तर अजून वाढतच जावे हीच इच्छा आहे.